" Or avez oy ci-devant les grans persécucions que le Roy et nous souffrîmes, lesquiex persécucions la Royne n'en eschapa pas, si comme vous orrez ci-après. Car trois jours devant ce que elle acouchast, li vindrent les nouvelles que le Roy estoit pris; desquiex nouvelles elle fu si effréé, que toutes les foiz que elle se dormoit en son lit, il li sembloit que toute sa chambre feust pleinne de Sarrazins, et s'escrioit : " Aidiés, aidiés ; " et pource que l'enfant ne feust périz, dont elle estoit grosse, elle fesoit gesir devant son lit un chevalier ancien de l'age de quatre-vingts ans, qui la tenoit par la main; toutes les foiz que la Royne s'escrioit, il disoit : " Dame, n'aiés garde, car je suis ci. " Avant que elle feust acouchiée, elle fist wuidier hors toute sa chambre, fors que le chevalier, et s'agenoilla devant li et li requist un don; et le chevalier li otria par son serement; et elle li dit : " Je vous demande, fist-elle, par la foy que vous m'avez baillée, que se les Sarrazins prennent ceste ville, que vous me copez la teste avant que ils me preignent. Et le chevalier respondi : " Soiés certeinne que je le ferai volentiers, car je l'avoie jà bien enpensé que vous occirraie avant qu'il nous eussent pris. " La Royne acoucha d'un filz, qui ot à non Jehan; et l'appelloit l'en Tristan, pour la grant douleur là où il fu né. Le jour meisme que elle fu acouchée, li dit l'en que ceulz de Pise et de Genes s'en vouloient fuir, et les autres communes. Lendemain que elle fu acouchiée elle les manda touz devant son lit, si que la chambre fu toute pleinne : " Seigneurs, pour Dieu merci ne lessiés pas ceste ville, car vous véez que monseigneur le Roy seroit perdu et touz ceulz qui sont pris, se elle estoit perdue; et si ne vous plet, si vous preingne pitié de ceste chiétive qui ci gist, que vous attendés tant que je soie relevée. " Et il respondirent: " Dame, comment ferons nous ce, que nous mourons fain en ceste ville! " Et elle leur dit que jà par famine ne s'en iroient; " car je ferai acheter toutes les viandes en ceste ville, et vous retieing touz desorendroit aux despens du Roy. " Ils se conseillerent et revindrent à li, et li otroierent que il demourroient volentiers; et la Royne, que Diex absoille, fist acheter toutes les viandes de la ville, qui li cousterent trois cens et soixante mille livres et plus. " Avant son terme la couvint relever, pour la cité que il couvenait rendre aus Sarrazins. En Acre s'en vint la Royne, pour attendre le Roy. "